نهوروزتان پیروز و ههمۆ ڕۆژێکتان نوروز بۆت
ههر کهس له بان ئی زهویه ئهڕا خۆێ ڕوژێک دێرێت، تا بکهێتهێ بههانه ئهڕا ئهوه له دهور یهکتر جهم بوون، وه یا وه یه جورگهلێک وهل وڵات و ئاو خاکهکهێان پهێمان تازه بکهنوه، و بۆیشن ئیمه ڕوڵهێ توێم، و خاک و ئاوت ئهڕامان مۆقهدهسه. نهوروز ئهڕا ئیمه، تهنیا ڕۆژ سادهێهک ئهڕا لهباس تازه سهندن یا تهفریح کردن نیه. له تاریکایی تاریخ نهوروز پهێام پیرۆزی کاوه ئاسنگهر وه سهر زههاک ئهڕامان هاپێ، وه در ێژایی عومر کوردیچ نهوروز نیشانهی وه ڕهمز مۆقاومهت ملهتێکه، که وه ههڵگیرسان ئاگر ێک ویشێت ئهی ڕهقیب ههر ماوه قهومی کورد زبان، ئی ئاگریچه نیشانهی بوون و پیروزیمه. له باقی شارهکان ئێران سۆفرهێ ههفت سین داخهن، له کوردستان ئاڵای خۆینن له سهر بانهکان وه دهم کزهی وا ێ وههاریوه شهکیهتوه.
ئهڕا مهردم یارسان نهوروز ئهویچ له ژێر ساێهێ نزام زاڵم جمهوری ئسلامی، تهنیا مۆژدهێ ئهوه هاورد که مهردم، ههڵسن، بارکهن بچنه ئهڕا داڵههو، تا دهس ناپاک پاسدار نهڕسێته پیتان. تهنیا یه نهوروز مهردم یارسان توانستن له دهس جمهوری ئسڵامی پهنا بوهنه داڵههو، ئهڕا چهن مانگ ێک خۆێان له دهس ئهوان بشارنهوه، باقی ساڵهکانتر، دونیا گوڕیا، نهوروز ژماره 2 مردم یارسان، ئاواره و پهڕاوازه بۆێ، و سهرنوشت نامالۆمێک له ئنتزارێان بۆی. لهو ڕوژه تا ئیسه، نهورزیچ وهل ئمیهێا ئاوارهس، وه تهنیا ڕوژێکه که گوشهێ تهنیایی ماڵکانمان، وه دهنگ تکست مۆبایل وه خهوهر تییهیم، وه نهوروز یهک جارتر خهێتهمانه فکر یهکتر.
ههرچێ ساڵه ئارهزو کهیم که نهوروز ئایهنده له داڵههو جهشن گریم، ئهما ئیه نزیک وه 3 دههس که ئی ئارهزوه له دڵمان خهریکه. وهلێ نهوروز له ئهزهڵ هاتگه، و قهرار تا ئهبهدیش وهلمانا بۆت. وهختێک نیازێک دۆعا دریهت، بهش ئاگر (وجاخ) حهتمهن فهراموش ناوت، و ئیه نیشانهێ ئهوسه که ئیمه ههر ڕوژ نهوروزمانه، و ئاگر نیشانهی زندهگیمانه. ههرچهند ئیمه له ئهزڵیچ هۆیچ نهێاشتیم تا سفرهێ ههفت سین بچنیم، وهلێ نهوروز ئهڕامان ههدیه گیلیاخه، پالمێ، پیچک و گۆنۆڕ،،،،،،هاورد، تا یهکجارتر بتوانیم دهممان وه تام شیرن گۆنوڕ شیرن بوتوه. له شون چهند مانگ نان وشک جایین، له نهوروز دوباره مهزهێ ماس و دوو له ناو مهشکهێ دویکهڵین گیان خسته وهرمان، وه سهرمهست له تورشی ماس وهل ڕیهن و وهرگهلا خهو کهفته پیمانه.
نهوروز لهوه فرهتریچ ههدیه ئهڕامان هاورد، ئهویچ ئهوه بۆی له دهس مهدرهسهێ زورهملی نجاتمان بۆی، له خوندن وه زوان داگیرکهر ڕهها بویمن، وهلێ ئهوان له ئیمه زیرهکتر بوین، وه مهشق نهوروزی دانه ملمانه. له ڕوێ ئهو کتاوه که تا نهوروز خوندویمنهێ، و له سهر خهت وه خهتێ کۆتهک خۆاردیم، باێهس یه دهور بنویسێایم. ئیمهیچ نامهردی نهکردیم، تا 2/3 ڕوژ وه هاتنهوێ ماموستا، کتاو واز نهکردیم، وه ئهگریچ واز کردیم و نوسیایم وه خهت گهوره نویسایم، و مل فره له جۆملهکانا باز بردیم، وه یه دهفتهر سیه کردیموه. جا له شوون سێنزه وه دهریچ دوباره چهومان پڕ بۆی له گریان، وه دهس فهڵهکه و فهلاقهێ مالم زاڵم فارس زوانوه. تهخسیر نهێاشتیم، چوین ههر مهدرهسه تاتیل بۆی ئیمه وهل ڕیهن و ساوهێا بۆیمن. کتاوهکانیچ له سهر زندهگی مهردم شار نویساوین، ئیمهیچ ههرچی کهلیمه داشت ئهڕامان نائاشنا بۆی. ئیمه ئاو لا کانی وه بان سهر هاوردیم، ئهوان ئهکس یه شیر ئاو کیشاوین، ئیمهیچ نهزانستیم چهس.
ئهما بان تا ئی نهوروزه بکهیمه ڕوژ ئاشتی، وهل خۆمانه، وهل تهبیعهتا، وهل ههرکهسا که تۆزێک لهدسێ ناڕاحتیم یان له دهسمان ناڕاحهته. نهوروز کاوه تهنیا وه ئتهحاد ئمکان پیروزی داشت، با ئیمهیچ ئی نهوروزه بکهیمه نهورز ئاشتی و سۆلح و ئارهزو بهکهیم که ئیتر هۆیچ کهس وه زک ورسگ، سهر نانهێته بان پاڵشت، هۆیچ دڵێک وه دهردێک له ناکاو نهتهزێت، ههرکهس ههر ئارهزوێک ئنسانی دێرێت وه پێ بهڕهسێت. با وهیهکوه بچیمه دهیشت، و له ئاشتی زهوی و گۆڵ و گیا دهرس وهر بگریم، که چه جۆر باوش کردگناسه مل یهکا، و دهم کزهێ واێ وههاروه، ئهڕامان ڕهخس کهن. ئیمهیچ با وه یه بزه له سهر لێو، وه یهک بۆیشیم ساڵ تازهت پیروز بۆت، وه ههمۆ ڕۆژێکت نهورز.
نهوید 20.03.07 نروژ
