نامهێهک ئهڕا بان کی مۆن دهبیر کۆل سازمان ملل مۆتهحد.
له تهرهف واڕکهل جۆان، یه نان له دۆنیا ناخۆاردگهوه
جناب دهبیر کۆل سازمان ملل مۆتهحد، سڵام و یاعلی مدد
له ڕۆژگار پڕ له شهڕ وشۆڕ ئیمڕۆژ ئی دۆنیا له شون جهنگ سارد، زانم ئیوهیچ گرفتای فرهێک دیرین، له سودان مۆشکڵ دهرفۆر، له خاوهر میانه مۆشکل ئسرائیل وفلسطین و ههزار مۆشکل تر. ئهما وه گیان جنابت و ئهو سیوڵگهلته که نایتهسهێ بان کۆچک ههر ئیمامێک، گیان ڕهسیگهسه دهر حهڵقمان. ئیمه واڕکهل جۆان یه نان لهی دۆنیا ناخواردگ، وه تهماێ مانگ عهسهڵ بیمن، خوشی خۆشیمان بۆی، که له شون پاییز بتوانیم دهس نامزهداکانمان بگریم، و لهی ههمکه دانهێ وه جێ ماگ، گهنم و گیاه پایزه زگکێک له عهزا دهرباریم، وه خهێریهت چهند ههزار سکهێ بههار ئازادی بکهنه پشت ئختمان، و ئیمهیچ بچیمه ماڵ شوێ تا وهل خهسۆێرانه دهگیر بۆیمن. وه لهشون بڕێک خۆشگۆزهرانی ئیمهیچ بایمه خاکردن، و ئهگهر خودا و ماڵ بهشدارگهل گهوره نجات بێهێت بۆیمنه خاون جۆیلک و مناڵ.
ئهڵبهت با له فکرمان نهچوت که ئیمه له زامهتگهل ئیوه ئهڕا چاره سهرکردن ههوا و قوفهێ پهڵهوهر تهشهکۆر کهیم. ههرچهند زانیم ههرماێ هۆیچ دهوا و دهرمانێک ئهڕا ئهو نهخوشیه پهێا نویگه وهلێ ئیمه ههر ساڵ تویش یه جۆر له ژنۆساید بۆیمنهوه، وه دهس مهردمێک که خۆێان له ئیمه بێچارهترن. ئیمسالیج جۆر ههر چێ ساڵه ههرچێ کهڵهشێره که تهنیا یه جار قویلانۆین، گیانێان کهفته خهتهر، و گیان خۆت و مناڵت ئا وهختێک ئی نامه ئهڕا جنابتان نۆیسمن، خهوهرێک له سهرنوشتێان نیه، بهڵام لهوه مۆتمهئنیم که ئیسه هانا ناو قهزگان و خهریکن کۆڵیهن.
بهڵی جناب دهبیر کۆل، چهن ڕۆژ وهر له ئیسه له کۆنگرهێ ئهمریکا باس کۆشتار یان وه قهوڵ ژنۆساید ئهرمهنیهکان کریا، تۆرکیه زۆرێ وه ئهمریکا نهشکیا ههڕشه کردهگه که حهمڵه کهێت کوردستان، دۆنیا ویشێت ئێران باێهس بۆمب ئهتۆم نهێاشتوت، ئهویچ پۆیل دهێته حهماس تا حهمڵه بهکهێته فلسطینیهکان، یا مهلا سهدر ئهڕا ئیه سهرباز ئهمریکایی بکوشن، له ناو جهرگهێ ئی سهر لێ شێوێایه ئیمهیچ تهسمیم گردیم ئهڕا جنابت ئی نامه بنۆیسیم، نازانم ئهو وهخته دواره کی حهمڵه کهێته کی؟؟ ئهما دهرد ئیمه گرانه، ههرچهند گشت ئازیهت باریم و پڕ دهممان له خۆینه، وهلێ خۆدا ههڵ ناگرێت، دی ناتوانیم دهم خۆمان زیاتر لهئیه بوهسیم.
ئیمه وهختێک تهسمیم گردیم ئی نامه ئهڕا جنابتان بنویسیم، یهکی له حازرگهل له کۆنگرهکه پێشنههاد کرد، که ئیمه دیالۆگ بکهیم، یا ههر نهوت وهل خانم شیرین عهبادی قسه بهکهیم چوین ئهویچ زاێفهێکه جۆر ئیمه، ئهما یه مامر سهره که خۆێ دۆنیا دیگه بۆی فهرمایش کرد، مامر تێر کهێ له زک خالی مامر ورسگ خهروه دێرێت، خانم عهبادی درۆسه شکڵی جۆر واڕکه، و مهغزیچی هین مامره، وهلێ ئهوان دهوڵهمهنن، وه زیاتر هاله فکر، ئسڵام ئهزیزا، و لهوه خراوتر دهفاع کهێ له تروریستهکان گوانتانامۆ. تهقریبهن توانیم بۆیشیم خانم عهبادی جۆر تانجیک نهتوانێت خهروش بگرێت، مێز کهێته بنجکێکا، و خۆێ گوڵ دهێت، که گۆیا حقوق بهشهرێک له ئێران ئهزیز پاێماڵ ناوت. لهوهیچه بگۆزهریم خانم عهبادی کهڵهشێر خۆێ دێرێت، و خهم ئیمهێ قوڕ وهسهرێ نیه. ههر وهخاتر ئیه مهجبور بویمن، ئهڕا جنابت نامه بنویسیم وه داوا بکهیم که ئهگهر ئهڕاتان کریهت یه نمایهندهێ سازمان ملل متحد بهنێرنه ناوچهێ داڵههو، تا له سهر وهزعیهت ئیمه مامر و واڕکهل بێوهژن تهحقیق بکهن، هه چهن سازمان ملل حازر نهۆی ئهڕا تهحقیق له سهر بۆمباران شیمیایی زهرده و حهڵهبجه ئی کاره بهکهێت، وهلێ وهتیم چاره نیه بهشکو جنابتان که فره هاینه فکر باڵنده و پهڕهندهگهل ترا کارێک ئهڕا ئیمهیچ بکهین. ئیوه فکر بکهن ئهگهر دهزیۆران دۆیتهکهێ خوتان ئیسه له قهزگان بۆت و بکۆڵێت، چه فکر کهین. له زمن ئیه، ئیمه حهتا قاڵاویچ تانه دهێته لیمان، ویشیت باوک و باوکه وهرهتان ئهڕا یه دهنه گهنم، کڵاو چیه سهرێ، و له جێ ئیه باڵ بگرێت، و له سهر قوڵه بهرزهکان لانه بکهێت، خۆێ کرده مامر و کهڵهشێر ماڵی، ئهڕا ئیه کوڵانه ئهڕیان دروست بکهن، ئهوانیچ له جێ ئهوه خا بکهن، و شهو خاونهکانێان له خهو ههڵ بلسێنن. نازانم ئیه چهنێ ڕاسه، وهلێ ئیمه ههم دهر ههم له ماڵ دۆژمن دیریم، چیمنه دهیشت، ڕوی و چهقهڵ، تیهیمه ماڵ خاونهکانمان، له شون ئهوانیچ یه دونیا نهخوشی و بهدبهختی.
جناب دهبیر کۆل خوتان زانین ئیمه حهتا ئهگهر ماڵ و منالیچ درۆس بکهیم، خۆمان هۆیچ خهێرێک لهڵێان ناوینیم، ههر ئهوجۆره هۆیچ کهس خهێر له مناڵهکانێان ناوینێت، چوێن مناڵهکانێان یا بۆنه سهرباز یان وه خزمهتگۆزار یه بڕتر. ئیمهیچ کارمان بۆته خاکردن، کڕ کهفتن، له شونیچێ، کوڕهکانمان وه دهس مهردم قهتڵ و عام بۆن، خۆمانیچ وهختێک له خا بچیموه، یهشهو مهردم کهڵمه مشتێ کهر سهرمان بڕن. ئیسه وهی دهرد و گرفتاریوه مایمهسوه، کهسیچ نیه بچوته تهزاهۆرات ئهڕا دهر سفارهت ئێران یا تۆرکیه له لیمان دهفاع بکهێت. له ئاخرگهله ژنهفتیمه که یه تهزاهۆرات له اسلو پایتهخت نروژ کریاگه که توانیم بویشیم تهزاهۆرات ئاخر زهمانه، چوین له بارهێ ئهو حهرهکهتوه چهندین مهقاڵهی دۆیرو درێژ نویساوی، فکر کهم دی مهردم کورد لازم نهێرن هۆیچ کارێک بهکهن، حهتا ههرچێکێچ لهیه وهر کریاگه، جۆر جمهوری مههاباد و شێخ مهحمود مهلک و ئهوانه، چهنه ئی تهزاهۆراته ئهسهر ئازادیبهخش نهێاشتگه، بهڵام ئیمه بێکهسیم، نه کۆمیته مهرکهزی دیریم بهر عهلهێ خۆمان چشتێک بنویسیت و نه کهسیچ ههس بچوت تهزاهۆرات ئهڕا دهفاع له حهق و حقوقمان. پهس ئیمه له خۆدا شک بهیم و ئیوه، ئهگهر ئهڕاتان ئمکان داشت حهتمهن یه کارێک بکهن. ئهلبهت خۆمان وهل بڕێک له هاودهردکانمان جۆر وهراز و خهروش و ئیانه مهشوهرت کردیم، وهراز فهرمایش کرد، که ئیمه توانیم بچیمه ناوچهێ شنگار، چوۆین برادران یهزیدی کهڵهشێر ناخۆن، ئهما خهوهر ڕهسی که براداران ئهلقائده و ئهسار السنه مهردم ئهو مهنتهقیچه وه خاک خۆین کیشانه، ئهڕا ئیه خۆیان زویتر بچنه بهههشت، وهل هوریه جوانهکان بهههشت کهێف و حاڵ بکهن، و له فازڵاو بههشهت که ویشن شهراو ئسپانیا وه خهوێ ناتێت نوش گیانێان بهکهن. ئیمهیچ وهتیم ئی پێشنهاد ئاقاێ وهرازه وهل جنابتا تاو تۆێ بهکهیم بزانیم ئمکان دێرێت کهمپێک ئهڕامان له شێخان یا شهنگار دروست بهکهین، ههر چهند زانیم ئیسه مهردم فرهێک کورد یارسانی لهو دیو هۆیچ شونێک نهێرن له ناوێ ژیان بکهن. ئاقاێ وهراز فهرمایش کرد، که ئهوان ههر زۆی زانستگنه چ خهتهرێک گیانێان تههدید کهێت ئهگهر باێت و له داڵههو بوسن، ههر وهی خاتره چینه بۆینهسه مێوان سفرهێ پڕ له زڕات مهردم لۆڕستان و بهقیهێ براداران ئسڵامی. ئهما مۆتهسفانه ئیسه وهزع ئهوانیچ فره خاس نیه، چۆین مهردم داڵههو نشین و برا لۆڕهکان قهرداد ئسترداد ئمزا کردگهنه که ههر وهرازێک بوینن تهحویل مهنتهقهێ دالههوێ بێهنوه.
ئهڵبهت ئیه مۆشکڵ ئیمه نیه، چوین ئاقاێ وهراز خۆیان ماشالا زیرهکن، توانن حهق خۆێان له زهوی و مهردم بسهنن، بهڵام ئیمه هۆێچ له دهسمان ناتێت، تهنیا ئهوه نهوت که خاکانمان بشکنیم یاله دهیشت کۆلانکه یا له کۆلانهێ ماڵ هاوسا بهکهیمهێ تا ئهوان له سهر خاکان بۆته جهنگێان. وهلێ ئیانه هۆیچ کامێ ڕاه حهڵ خاسێک نیه و گشتێ تاقی کریگهسوه. تهنیا ئۆمێدمان ئیوین، خۆمانیچ زانیم ئیوهیچ هویچ له دهستان ناتێت، وهلێ ئهڕا دڵخۆشی خۆمان ئی نامه ئهڕاتان ههینریم، شایهد توانستیم یه ڕۆژ یه عهکسێک وهل یهکا بگریم ئهڕا یادگاری.
رونوشت به: ملکه الیزابت ملکه انگلیس
ملکه دانمارک خانم نیزانم ناوێ بوهخشن
زیاده عرضی نداریم قربان شما کۆمیتهێ دفاع له حقوق واڕکهل بێوهژن.
